തിരുവനന്തപുരം:.കേരള രാഷ്ട്രീയത്തിലെ ഏറ്റവും ജനപ്രിയനായ നേതാക്കളിലൊരാളും മുൻ മുഖ്യമന്ത്രിയുമായ വി.എസ്. അച്യുതാനന്ദൻ കേരളത്തിന്റെ പ്രതിപക്ഷ ശബ്ദമായും ഭരണാധികാരിയായും ജനമനസ്സുകളിൽ ചിരപ്രതിഷ്ഠ നേടിയ വിപ്ലവനക്ഷത്രമാണ്. പുന്നപ്ര-വയലാർ സമരത്തിന്റെ തീച്ചൂളയിൽ നിന്ന് ഉയർന്നുവന്ന്, സാധാരണക്കാരുടെയും തൊഴിലാളികളുടെയും അവകാശങ്ങൾക്കായി ജീവിതം മാറ്റിവെച്ച പോരാളിയാണ് വി.എസ്.
1923 ഒക്ടോബർ 20-ന് ആലപ്പുഴയിലെ പുന്നപ്രയിൽ ജനിച്ച വേലിക്കകത്ത് ശങ്കരൻ അച്യുതാനന്ദൻ അഥവാ ‘വി.എസ്’, ബാല്യകാലത്ത് നേരിട്ട വൻ പ്രതിസന്ധികളോട് പോരാടിയാണ് ജനനായകനായി വളർന്നത്. നാലാം വയസ്സിൽ അമ്മയെയും പതിനൊന്നാം വയസ്സിൽ അച്ഛനെയും നഷ്ടപ്പെട്ട വി.എസ്, ഏഴാം ക്ലാസ്സിൽ പഠനം നിർത്തി തയ്യൽക്കടയിലും കയർ ഫാക്ടറിയിലും ജോലിക്ക് നിൽക്കുകയായിരുന്നു. 1938-ൽ സ്റ്റേറ്റ് കോൺഗ്രസിലൂടെ പൊതുരംഗത്തെത്തിയ അദ്ദേഹം 1940-ൽ കമ്മ്യൂണിസ്റ്റ് പാർട്ടി അംഗമായി. 
പോരാട്ടവഴികളും നാഴികക്കല്ലുകളും:
പുന്നപ്ര-വയലാർ സമരം:
സർ സി.പി. രാമസ്വാമി അയ്യരുടെ സ്വതന്ത്ര തിരുവിതാംകൂർ വാദത്തിനും ദിവാൻ ഭരണത്തിനുമെതിരെ തൊഴിലാളികളെ അണിനിരത്തി നടത്തിയ പുന്നപ്ര-വയലാർ സമരത്തിലെ പ്രധാന സംഘാടകനായിരുന്നു. ഈ സമരത്തെ തുടർന്ന് ക്രൂരമായ പോലീസ് മർദ്ദനവും ലോക്കപ്പ് പീഡനങ്ങളും അദ്ദേഹത്തിന് നേരിടേണ്ടിവന്നു.
സി. പി.ഐ(എം) രൂപീകരണം:
1964-ൽ സി.പി.ഐ ദേശീയ കൗൺസിലിൽ നിന്ന് ഇറങ്ങിപ്പോയി സി.പി.ഐ(എം) രൂപീകരിച്ച 32 നേതാക്കളിൽ ഒരാളാണ് വി.എസ്. (പാർട്ടി രൂപീകരണ നേതാക്കളിൽ ജീവിച്ചിരിക്കുന്ന ഏക വ്യക്തിയും അദ്ദേഹമാണ്).
പാർട്ടി നേതൃത്വം:
1980 മുതൽ 1992 വരെ 12 വർഷക്കാലം സി.പി.ഐ(എം) സംസ്ഥാന സെക്രട്ടറിയായി പ്രവർത്തിച്ചു. സി.പി.ഐ(എം) പോളിറ്റ് ബ്യൂറോ അംഗമായും ദീർഘകാലം സേവനമനുഷ്ഠിച്ചു.
തിരുത്തൽ ശക്തിയും ഭരണമികവും:
പ്രതിപക്ഷ നേതാവായിരുന്ന കാലഘട്ടങ്ങളിലാണ് വി.എസ്. ‘ജനകീയ പോരാളി’ എന്ന പ്രതിച്ഛായ പൂർണ്ണമായി നേടിയെടുത്തത്. പരിസ്ഥിതി സംരക്ഷണം, കയ്യേറ്റങ്ങൾക്കെതിരായ പോരാട്ടം, സ്ത്രീകൾക്കെതിരായ അതിക്രമങ്ങൾക്കെതിരെയുള്ള നിയമപോരാട്ടങ്ങൾ, അഴിമതി വിരുദ്ധ നിലപാടുകൾ എന്നിവയിലൂടെ അദ്ദേഹം ജനങ്ങളുടെ പ്രിയങ്കരനായി മാറി.
മുഖ്യമന്ത്രി കാലഘട്ടം (2006 – 2011):
2006-ൽ കേരളത്തിന്റെ 20-ാമത് മുഖ്യമന്ത്രിയായി ചുമതലയേറ്റ വി.എസ്. ഭരണത്തിലും തന്റെ വിപ്ലവ വീര്യം കാത്തുസൂക്ഷിച്ചു. മൂന്നാർ കയ്യേറ്റം ഒഴിപ്പിക്കൽ, അനധികൃത ലോട്ടറി മാഫിയകൾക്കെതിരെയുള്ള നടപടികൾ, നെൽവയൽ-തണ്ണീർത്തട സംരക്ഷണ നിയമം, സൗജന്യ-സ്വതന്ത്ര സോഫ്റ്റ്വെയർ നയം എന്നിവ വി.എസ്. സർക്കാരിന്റെ മായ്ക്കാനാവാത്ത നേട്ടങ്ങളാണ്.
അഡ്മിനിസ്ട്രേറ്റീവ് പരിഷ്കരണ കമ്മീഷൻ അധ്യക്ഷൻ:
2011 മുതൽ 2016 വരെ വീണ്ടും പ്രതിപക്ഷ നേതാവായി തിളങ്ങിയ വി.എസ്, 2016-ൽ ഒന്നാം പിണറായി സർക്കാരിന്റെ കാലത്ത് അഡ്മിനിസ്ട്രേറ്റീവ് പരിഷ്കരണ കമ്മീഷൻ അധ്യക്ഷനായും പ്രവർത്തിച്ചു.
ആരോഗ്യപരമായ കാരണങ്ങളാൽ സജീവ രാഷ്ട്രീയത്തിൽ നിന്ന് മാറി നിൽക്കുമ്പോഴും, കേരളത്തിലെ ഓരോ രാഷ്ട്രീയ കൊടുങ്കാറ്റുകളിലും വി.എസിന്റെ നിലപാടുകൾ എന്താണെന്ന് അറിയാൻ രാഷ്ട്രീയ കേരളം കാതോർക്കാറുണ്ട്. നിലപാടുകളിലെ കാർക്കശ്യവും സാധാരണക്കാരോട് ചേന്നുനിൽക്കുന്ന ജനകീയതയുമാണ് വി.എസ്. അച്യുതാനന്ദൻ എന്ന രാഷ്ട്രീയ പ്രതിഭാസത്തെ മറ്റുള്ളവരിൽ നിന്ന് വ്യത്യസ്തനാക്കുന്നത്.
ഡോ. മുരളി മോഹൻ