വേങ്ങശ്ശേരി: അനന്തു രാജിനെ തേടി കൂട്ടുകാർ വീട്ടിലെത്തി. തീവ്ര ഭിന്നശേഷി മൂലം സ്ഥിരമായി സ്കൂളിൽ എത്തി പഠിക്കാൻ സാധിക്കാത്ത അനന്തു രാജിന്റെ വീട്ടിലെത്തി സഹപാഠികൾ കേക്ക് മുറിച്ചു ക്രിസ്തുമസ് – ന്യൂ ഇയർ ആഘോഷിച്ചു. അമ്പലപ്പാറ പറക്കാട്ടു പറമ്പിൽ രാജൻ- മഞ്ജുള ദമ്പതികളുടെ രണ്ടു മക്കളിൽ മൂത്ത പുത്രനാണ് അനന്തു രാജ്. ഈ വർഷം എട്ടാം ക്ലാസ്സിലേക്ക് വേങ്ങശ്ശേരി എൻ എസ് എസ് ഹൈസ്കൂളിൽ ചേർന്ന അനന്തു രാജിന് മറ്റു കുട്ടികൾക്കൊപ്പം പഠിക്കാൻ ശാരീരിക അവശത കൊണ്ട് സാധിച്ചില്ല. ഈ അവസ്ഥ പരിഗണിച്ചാണ് വിദ്യാലയം ക്രിസ്തുമസ് – പുതു വത്സര ആഘോഷത്തിൽ ഉൾക്കൊള്ളിക്കാൻ ശ്രമം നടത്തിയത്. പ്രധാനാധ്യാപകൻ എം. ശശികുമാർ ഉദ്ഘാടനം ചെയ്തു. ഒറ്റപ്പാലം ബി. ആർ. സി സ്പെഷ്യൽ എഡ്യൂക്കേറ്റർ എം. ടി. ഷഫീർ അധ്യക്ഷനായി. വി. വിദ്യ, എസ്. അഖില എന്നിവർ സംസാരിച്ചു.
